මෙහිදී සමුළුව අමතමින් පෙරටුගාමී සමාජවාදී පක්ෂයේ ප්රධාන ලේකම් කුමාර් ගුණරත්නම් සහෝදරයා දැක්වූ අදහස්
" . ඉරානයේ නායකයා ඝාතනය කළා කියල ට්රම්ප් වහසි බස් දොඩමින් ඉන්න මොහොතක් මේක. එහෙම වෙලාවක තමයි අපි පෙරටුගාමී සමාජවාදී පක්ෂය විදිහට අපේ 4වන ජාතික සමුළුව පවත්වන්නේ.
අද අපේ රටේ පාලන බලය හොබවන ජනතා විමුක්ති පෙරමුණ මේ වෙද්දි ඉතාම බරපතළ ලෙස ඔවුන්ට ඡන්දය ලබා දුන් මහජනතාවගේ අභිලාශයන් උල්ලංඝනය කරමින් යනවා. ත්රස්තවාදය වැලැක්වීමේ පනතට විරුද්ධව ඉතිහාසයක් පුරාම පෙනී හිටපු පක්ෂයක් තමයි අද බලයට ඇවිල්ලා තිබුණටත් වඩා භයානක PSTA මර්දන පනත සම්මත කරගන්න වලිකන්නේ. නිදහස් අධ්යාපනය, නිදහස් සෞඛ්ය වෙනුවෙන් පෙනී හිටපු පක්ෂය අද බලයට ඇවිත් අධ්යාපනය සෞඛ්ය වනසන නවලිබරල් IMF ප්රතිපත්ති කිසිඳු හිරිකිතයක් නැතුව ක්රියාත්මක කරන්න පටන් අරගෙන. අද අනුර කුමාර ප්රමුඛ ජාතික ජන බලවේග ආණ්ඩුව ඉන්දියාව ඇමරිකාව ඉස්සරහ දණින් වැටිලා විතරක් නැවතිලා නැහැ. මෝදිලගේ ට්රම්ප්ලගේ නවලිබරල් ආර්ථික දේශපානලන වුවමානාවන් වෙනුවෙන් මුළු රටමත් ජනතාවත් පාවා දීලා ඉවරයි.
ඇමරිකාව මේ වෙනකොටත් ඉන්නේ තමන් අතින් ගිලිහෙන ආර්ථික බලය රැකගැනීමේ උමතුවෙන්. මැදපෙරදිගට ඔවුන් පහර පිට පහර දෙනවා. ඊශ්රායලය කියන රූකඩ රාජ්ය ඉස්සරහට දාගෙන අපි දැක්කා ගාසා තීරයේ මහා ජන සංහාරයක් කරපු විදිහ. කිසිඳු සඳාචාරයක් නැතුව වෙනිසියුලාවට බලෙන් කඩා පැනලා ඒ රටේ ජනාධිපතිවරයව පැහරගෙන ගියා. ඇමරිකාව මේ කෙළ හලන්නේ වෙනිසියුලානු තෙල් ළිං වලට බව හොඳටම පැහැදිලියි. අද වෙද්දි ආජන්ටිනාව බොලීවියාව ආශ්රිතව තියන ඛනිජ ත්රිකෝණයටත් ඇමරිකානු ප්රාග්ධනය ඉව අල්ලමින් ඉන්නේ. මේ වෙද්දි ඉරානයට කඩා පැනලා මහා ජන සංහාරයක් ආරම්භ කරලා ඉවරයි. එක්සත් ජාතීන්ගේ සංවිධානය මේවා දිහා නිහඬව බලාගෙන ඉන්නවා. ඇමරිකානු අධිරාජ්යවාදයේ මෙලෙච්ඡ තුච්ඡ බල ක්රීඩාවට එරෙහි වෙන්න එක්සත් ජාතීන්ගේ සංවිධානයට කොන්දක් නැහැ. අද මැදපෙරදිග කලාපයේ දිගහැරෙන යුද්ධයට එක එක ලේබල් අලවන්න උත්සහ කලාට අපි දන්නවා මේක පිටිපස්සෙ තියෙන්නෙ ඇමරිකානු ප්රාග්ධනයේ වුවමානාවන්. ලෝකයේ වැඩකරන ජනතාවගේ නිර්ධන පන්තියේ ශ්රමය සූරාකමින් ලාභ උපයගත්ත මහාපරිමාණ ප්රාග්ධන හිමියන් මේ වෙද්දි ඉන්නේ උමතුවෙන්.
මේ අධිරාජ්යවාදී බල වියරුවට එරෙහිව අපිට තියෙන්නේ එකම විකල්පයයි. ඒ තමයි සමාජවාදය. ජාත්යන්තර මට්ටමේ නිර්ධන පන්ති ව්යාපාරයක් මගින් විතරයි මේ බල වියරුව පරාජය කරන්න පුලුවන් වෙන්නේ. අපි පෙරටුගාමී සමාජවාදී පක්ෂය විදිහට ඒ සමාජවාදය ජයග්රහණය කරවන්න අවශ්ය හැම ශක්තියක්ම යොදවනවා. දැන් සමහරු අහනවා කෝ කියුබාව කලාද කියලා. අපි ඔව්න්ට කියන්නේ ඔව් කියුබාව ඉතිහාසය තුළ තමන්ගේ කාර්ය කොටස හරියටම කරලා ඉවරයි. ලෝකේ හොඳම අධ්යාපන ක්රමය, සෞඛ්ය ක්රමය කියුබාවේ තියනවා. කොරෝනා කාලේ රටවල් ගණනාවකට ඔවුන් නොමිලේ වෛද්ය පහසුකම් දුන්නා. ජාතිවාදයට ආගම්වාදයට යට වෙන ලෝකයක. අධිරාජ්යවාදී බල උමතුවක පැටලිලා ජන ඝාතක යුද්ධවලට අර අදින ලෝකයක කියුබාව ඉතාම අසීරුවෙන් රතු ධජය ඔසවගෙන මනුෂ්යත්වයට අඬ ගහමින් ඉන්නවා. ඒ නිසා තමයි අපි කියුබාවට හිස නමා ආචාර කරන්නේ. ඒ කියුබානු ආදර්ශය අපි අමතක කරන්නේ නැහැ. අද මේ අධිරාජ්යවාදී බල වියරුව පරාජය කරන්න තියන එකම මග සමාජවාදය බව නැවත නැවතත් තහවරු වෙලා ඉවරයි.
ඒ නිසා පෙරටුගාමී සමාජවාදී පක්ෂය විදිහට අපි අද ගන්නේ නව ඇරඹුමක්. තට්ටු මාරු ක්රමයට මේ රට පාලනය කරපු සියලු දේශපානලන පක්ෂ මේ වෙද්දි සුන්බුන් වෙලා ඉවරයි. ඒ සුන්බුන් ගොඩේ තවදුරටත් මැණික් තියෙයි කියලා හිතන එක මෝඩ කමක්. ඒ ගඳගහන කුණු හෝදලා දාන්න දැන් කාලය ඇවිත්. අපි දන්නවා ජනතාව මාලිමා ආණ්ඩුවට බලය දුන්නේ ඒ වෙනුවෙන්. හැබැයි ඒ අරමුණු පැත්තකට දාලා ආණ්ඩුව අද හොරු ආරක්ෂා කරන ප්රතිපත්තියකට ඇවිත්. අද දේශපානලන සංදර්ශනවලින් මෙහාට මොනවත් වෙන්නේ නැහැ. ඉන්දියාවට ලංකාවේ තියන ඉඩම් ටික වරාය ගුවන්තොටුපළවල් විකුණනන්න මේ ආණ්ඩුවත් සැළසුම් කරනවා. ජනතාවගේ කරමත බදු පිට බදු ගහලා. ගල් අඟුරු ටෙන්ඩරයේ ප්රශ්නය වගේ ඒව නිසා මේ ආණ්ඩුවේ සුජාතභාවය ගැන දැන් ඡන්දෙ දුන්න ජනතාවම ප්රශ්න කරන්න අරගෙන ඉවරයි. අද අනුර කුමාර ට්රම්ප් එක්ක මෝදි එක්ක රට පාවාදෙන ගිවිසුම් අත්සන් කරනවා. ඒ ගිවිසුම්වල තියෙන්නේ මොනවද කියලා රටට හෙළි කරලා නෑ. මේවගෙන් මේ ආණ්ඩුවේ විනිවිද භාවය ගැන අපිට මතුවෙන්නේ බරපතළ සැකයක්.
ඒ නිසා තවදුරටත් මුහුණු මාරු කරලා පක්ෂ මාරු කරලා මේ ප්රශ්නය විසඳන්න පුලුවන් කමක් නැහැ. උදාවෙන දේශපානලන මොහොත තුළ මේ රටේ ජනතාව සක්රියව දේශපානලනයට මැදිහත් විය යුතු මොහොතක්. තවදුරටත් මුහුණක් පක්ෂයක් බලයට ගෙනල්ලා තේරුමක් නැහැ. පන්තියට බලය ලබා ගැනීම තමයි අපිට තියන එකම විසඳුම. අධිරාජ්යවාදයට එරෙහිව, IMF නවලිබරල් ආර්ථික ප්රතිපත්තියට එරෙහිව, ඇමරිකානු ඉන්දියානු මැදිහත්වීම්වලට එරෙහිව මහජන බලයක් අපි ගොඩනගන්න ඕන. අන්න ඒ ජනතා බලය ගොඩනගන්න එකතුවෙන්න කියලා අපි මේ වෙලාවේ මේ රටේ සියලු වැඩකරන ජනතාවට ආරාධනා කරනවා. "
පෙරටුගාමී සමාජවාදී පක්ෂයේ නව දේශපාලන මණ්ඩලය සහ ලේකම් මණ්ඩලය
පෙරටුගාමී සමාජවාදී පක්ෂයේ 4 වැනි ජාතික සමුළුවේදී තෝරා පත් කර ලද නව මධ්යමක කාරක සභාව අද (2026.03.02) උදෑසන නුගේගොඩ පිහිටි ප්රධාන කාර්යාලයේදී රැස් විය. එහිදී පක්ෂයේ නව දේශපාලන මණ්ඩලය සහ ලේකම් මණ්ඩලය පත් කර ගනු ලැබීය.
ඒ අනුව පත් කරන ලද නව දේශපාලන මණ්ඩලය මෙසේය.
1. කුමාර් ගුණරත්නම්
2. සේනාධීර ගුණතිලක
3. පුබුදු ජයගොඩ
4. චමීර කොස්වත්ත
5. දුමින්ද නාගමුව
6. රවීන්ද්ර මුදලිගේ
7. රංජිත් ශාන්ත
8. චන්ද්රසිරි ලන්දගේ
පක්ෂයේ නව ප්රධාන ලේකම්වරයා ලෙස කුමාර් ගුණරත්නම් සහෝදරයා පත් කර ගත් අතර ලේකම් මණ්ඩලය පහත පරිදි වේ.
• ප්රධාන ලේකම් කුමාර් ගුණරත්නම්
• සංවිධායක ලේකම් සේනාධීර ගුණතිලක
• අධ්යාපන ලේකම් පුබුදු ජයගොඩ
• ප්රචාරක ලේකම් චමීර කොස්වත්ත
• බහුජන ලේකම් දුමින්ද නාගමුව
• පාලක ලේකම් රවීන්ද්ර මුදලිගේ
• මුදල් ලේකම් විමල් වත්තුහේවා
