කොවිඩ් – 19 වෛරස තත්ත්වය හේතුවෙන් මෙවර ඔස්කාර් සම්මාන උළෙල සීමිත පිරිසකගේ සහභාගීත්වයෙන් 2021 ඔස්කාර් සම්මාන උළෙල, අමෙරිකාවේ ලොස්ඇන්ජලීස් හිදී පැවැත්වූ අතර එහිදී හොඳම චිත්‍රපටයට හිමි ඔස්කාර් සම්මානය නෝමැඩ්ලෑන්ඩ් (Nomadland) චිත්‍රපටය වෙනුවෙන් හිමිවිය.
93 වැනි වරටත් පැවති මෙම සම්මාන උළෙලේ හොඳම චිත්‍රපටය වෙනුවෙන් මෙවර සම්මාන උළෙලේදී චිත්‍රපට 8ක් නිර්දේශ වී තිබූ අතර ඉන් නෝමැඩ්ලෑන්ඩ් (Nomadland) චිත්‍රපටය සම්මාන හිමි කර ගත්තේය.
එහිදී හොඳම නළුවාට හිමි සම්මානය ‘ ද ෆාදර් ‘ (The Father) චිත්‍රපටය වෙනුවෙන් රංගන දායකත්වය දැක්වූ ඇන්තනී හොප්කින්ස් (Anthony Hopkins) විසින් හිමිකර ගත් අතර නෝමැඩ්ලෑන්ඩ් ‘ චිත්‍රපටය වෙනුවෙන් රංගන දායකත්වය දැක්වූ ෆ්‍රාන්සස් මැක්ඩොමෑන්ඩ් 2021 වසරේ හොඳම නිළියට හිමි ඔස්කාර් සම්මානයෙන් පිදුම් ලැබුවාය.
83 හැවිරිදි වියේ පසුවන ඇන්තනී හොප්කින්ස් ඔස්කාර් සම්මාන උළෙලකදී හොඳම නළුවාට හිමි සම්මානය හිමිකරගත් වයස්ගතම පුද්ගලයා ලෙස සැලකේ.
මෙවර ඔස්කාර් සම්මාන උළෙලේ හොඳම චිත්‍රපට අධ්‍යක්ෂණයට හිමි සම්මානය චීන ජාතික ක්ලෝයි ෂාඕ හට හිමිවුවාය. ඔස්කාර් සම්මාන උළෙලකදී ආසියාතික කාන්තාවක් හොඳම චිත්‍රපට අධ්‍යක්ෂවරිය වෙනුවෙන් ඔස්කාර් සම්මානය හිමිකර ගත් පළමු අවස්ථාව මෙය වෙයි.
හොඳම සහාය නිළිය ලෙස ‘මිනාරි’ චිත්‍රපටය වෙනුවෙන් යූ-ජුන්-යුන් හට හිමි වූ අතර හොඳම සහාය නළුවා ලෙස ‘ජුදාස් ඇන්ඩ් ද බ්ලැක් මෙසායා’ චිත්‍රපටය වෙනුවෙන් ඩැනියෙල් කළුයුයා හට සම්මානය හිමි විය.
