2026දී සුමති සම්මාන රාත්‍රිය ජූලි (15) ශ්‍රී ජයවර්ධනපුර මොනාච් ඉම්පිරියල් හෝටල් පරිශ්‍රයේදී
අනුර ප්‍රේමලාල්
ඡායාරූප-තුෂාර ප්‍රනාන්දු
තිස්වෙනි සුමති සම්මාන උළෙල සියලු මාධ්‍ය මගින් මිලියන එකසිය පනස් නවයකට වැඩි පිරිසක් නරඹා තිබෙන බව සුමති සම්මාන නිර්මාතෘ හා සුමති සම්මාන සංවිධායක කමිටු සභාපති තිලංග සුමිතිපාල මහතා පවසයි.
ඒ මහතා මේ බව සඳහන් කළේ මෙම (17)දා කොළඹ පැවැති සුමති සම්මාන තිස්එක්වෙන සම්මාන උළෙල පවත්වන දිනය හා ස්ථානය ප්‍රකාශයට පත් කිරීම සඳහා පැවැති මාධ්‍ය හමුවට එක්වෙමින්ය.
පුංචි තිරයේ අසිරිමත් කලා මංගල්‍ය ලෙස හැඳින්වෙන සුමති සම්මාන ඉකුත් වසරේ පැවැති තිස්වෙනි සම්මාන උළෙල සමාජ මාධ්‍ය ලෙස සුමති සම්මාන උළෙලට අදාල මුහුණු පොත හා යුටියුබ් හා ටික්ටොක් හා ඉන්ස්ටග්‍රෑම් හී මිලියන තිසහතරයි එක්ලක්ෂ පනස්පන්දහස් හත්සිය පනස් දෙනකුද, බාහිර සමාජ මාධ්‍ය තුල මුහුණුපොත්වල මිලියන පනස් හයයි එක්ලක්ෂ විසිහතර දහස් හැටපහක්ද,යුටියුබ්වල මිලියන දාහතරකට වැඩිපිරිසක්ද,ඉන්ස්ටග්‍රෑම්වල මිලියනයක් අධික පිරිසක්ද ටික්ටොක්වල මිලිය එකොළහට අධික පිරිසක්ද නරඹා තිබෙන බව ඒ මහතා අනාවරණය කළේය.
මීට අමතරව පුවත්පත්වල තිබෙන වෙබ්අඩවි මගින් මිලියන හයයි දශම පහක්ද, රූපවාහිනි නාලිකා තුල මිලියන් තිස්පහක්ද මෙම තිස්වෙනි සුමති සම්මාන උළෙල නරඹා තිබෙන බවට ඒ මහතා තවදුරටත් කරුණු ගෙන හැර දැක්වූයේය.
මෙහිදි වැඩිදුරටත් අදහස් දැක්වු සුමතිපාල මහතා වැඩිදුරටත් මෙසේද කීය…. රූපවාහිනි නිර්මාණකරණයේ නියැලි දස්කම් විස්කම් අගය කරමින් සුමති සම්මාන උළෙල 1995 සිටි මේ දක්වා දශක තුනකටත් අධික කාලයක් පුරා අති සාර්ථක අඛණ්ඩව පවත්වාගෙන යන අතර එය රූපවාහිනි කලාව පිළිබඳ ලබාදෙන ප්‍රමිතිකරණයේ මිනුම් දණ්ඩක් ලෙසද සැලකේ. මෙහිදි පුංචිතිරයේ සෑම ක්ෂේත්‍රයක්ම ආවරණය වන ලෙස සම්මාන හැටකට ආසන්න සංඛ්‍යාවක් සෑම වර්ෂයකම ප්‍රදානය කෙරේ.
ඒ අනුව ලබන වසරේ 2026දී තිස් එක්වෙනි වරට පවත්වන සුමති සම්මාන උළෙල ජූලි (15) සවස 5.00ට ශ්‍රී ජයවර්ධනපුර මොනාච් ඉම්පිරියල් හෝටල් පරිශ්‍රයේදී අතිඋත්කර්ෂවත් අන්දමින් පැවැත්වේ.
එහිදි 2025 වසරේ ජනවාරි (01) සිට එම වසරේ දෙසැම්බර් (31) දක්වා සියලුම ශ්‍රී ලාංකේය රූපවාහිනි නාලිකාවල විකාශය කරනු ලැබු ටෙලි නාට්‍ය සහ වැඩසටහන් එහිදි ඇගයුමට සලකා බලනු ලැබේ.
මේ අවස්ථාවට එක්වූ මෙම සම්මාන උළෙලේ විනිසුරු මඩුල්ලේ සභාපති සම්මානිත මහාචාර්ය මුදියන්සේ දිසානායක මහතා… මෙතරම් පිරිසක් සම්මානය උළෙලක් නැරඹු පළමු අවස්ථාව විය හැකි බව පැවසීය.
සම්මාන උත්සව වැඩි ප්‍රමාණයක් පැවැත්වීම වැදගත්වන අතර එහි ස්වාධීනත්වය, නිසි ප්‍රමිතිකරණය හා ගෞරවණීය බව පැවැතීම වැදගත් බව පෙන්වාදුන්නේය. රූපවාහිනි නාලිකා මගින් සම්මාන උත්සවයට වැඩසටහන් ඉදිරිපත් කිරීමේදී නිසි පෙළගැස්වීමක් ඇතිව ඉදිරිපත් කිරීමේ වැදගත් බවට ඒ මහතා කරුණු විස්තර කළේය.
