ගාල්ල දිස්ත්‍රික්කයේ ග්‍රාම නිලධාරී වසම් 7කට දැඩි සංචරණ සීමා පැනවීමට සෞඛ්‍ය අංශ පියවර ගෙන තිබේ.
කොවිඩ් -19 ආසාදිතයින් 25 දෙනෙකු හඳුනාගැනීමත් සමග මෙම සංචරණ සීමා පැනවීමට පියවර ගත් බව ගාල්ල දිස්ත්‍රික් වසංගත රෝග විද්‍යාඥ වෛද්‍ය වෙනුර කේ. සිංගාරච්චි මහතා සඳහන් කළේය.
ඒ අනුව මිලිද්දූව, කෝන්ගහ, තලාපිටිය, දංගෙදර නැගෙනහිර, දෙද්දුගොඩ උතුර, දෙද්දුගොඩ දකුණ සහ මකුළුව යන ග්‍රාම නිලධාරී වසම්වලට සංචරණ සීමා පනවා තිබේ.
මෙම ප්‍රදේශවල පදිංචි කිසිදු පුද්ගලයෙකුට නැවත දැනුම්දෙන තුරු අත්‍යාවශ්‍ය නොවන හේතුවකට නිවසින් පිටතට යා නොහැකි බව වෛද්‍ය වෙනුර කේ. සිංගාරච්චි මහතා සඳහන් කළේය.
“මිලිද්දූව, කෝන්ගහ, තලාපිටිය, දංගෙදර නැගෙනහිර, දෙද්දුගොඩ උතුර, දෙද්දුගොඩ දකුණ සහ මකුළුව යන ග්‍රාම නිලධාරී වසම් 7හි ජීවත්වන ප්‍රජාව ඉදිරි දින කිහිපය තුළ තමන්ගේ සංචරණ සීමා දැඩි ලෙස සීමා කරලා ජීවත් වෙන්න වෙනවා. රාජ්‍ය නිලධාරීන් සේවා අවශ්‍යතාවය පරිදි අදාළ ආයතන ප්‍රධානියාට දන්වලා පොලීසියෙන් අවසර අරන් අත්‍යාවශ්‍ය සේවා සඳහා යන්න පුළුවන්.“
මේ අතර කොරෝනා වසංගත තත්ත්වය හේතුවෙන් ගාල්ල අධ්‍යාපන කොට්ඨාසයට අයත් සියලු පාසල් තවත් සතියක් වසා දැමීමට තිරණය කර තිබේ.
දකුණු පළාත් අධ්‍යාපන අමාත්‍යාංශයේ ලේකම් රංජිත් යාපා මහතා සඳහන් කළේ, ඒ අනුව ලබන 18 වන දින දක්වා ගාල්ල අධ්‍යාපන කොට්ඨාසයේ සියලු පාසල් වසා තැබෙන බවය.
