සංවිධානාත්මක අපරාධ කල්ලි සාමාජීක ගනේමුල්ල සංජීව ඝාතනය සම්බන්ධයෙන් ප්රධාන සැකකාරියක් ලෙස අවශ්යව සිටී ඉෂාරා සෙව්වන්දි ඇතුළු සය දෙනකු නේපාලයේදී අත්අඩංගුවට ගෙන තිබේ.
මෙම අත්අඩංගුවට ගැනීමට හැකිවි ඇත්තේ මෙරට විශේෂ මෙහෙයුම් කණ්ඩායමක් රාජතාන්ත්රීක අනුග්රහය යටතේ එරටදී සිදුකළ මෙහෙයුමකින් අනතුරුව බව ශ්රී ලංකා පොලීසිය පවසයි.
මේ සම්බන්ධ කරුණු අනාවරණය වූයේ අද (14) පැවැති පොලිස් මාධ්ය හමුවේදීය..
එහිදි වැඩිදුරටත් අදහස් දැක්වු පොලිස් මාධ්ය ප්රකාශක සහකාර පොලිස් අධිකාරි එෆ්.යූ. වුට්ලර් මහතා….මේ අතර, රටින් පලා ගොස් සිටින අපරාධකරුවන් 40 දෙනෙකුට මේ වනවිට රතු නිවේදන නිකුත් කර ඇති බවත් පැවසූ පොලිස් මාධ්ය ප්රකාශකවරයා, ඒ අතරින් මේ වනවිට අපරාධකරුවන් 18 දෙනෙකු ලංකාවට ගෙන්වා ගැනීමට මෙම වසර තුළ කටයුතු කර ඇතැයි ද පැවසීය.
පොලිස්පතිවරයාගේ ඍජු මැදිහත්වීම මත අපරාධ පරීක්ෂණ දෙපාර්තමේන්තුව සහ විශේෂ පොලිස් කණ්ඩායමක් ඒකාබද්ධව සිදුකළ මෙහෙයුමකින් අනතුරුව ඉෂාරා සෙව්වන්දිව නේපාලයේ දී අත්අඩංගුවට ගත් බව ද කියා සිටියේය.
ඉෂාරා සෙව්වන්දි සමඟ තවත් සැකකරුවන් සිව්දෙනෙකු අත්අඩංගුවට පත්වූ අතර, මෙහිදී තවත් කාන්තාවක් හා කෙහෙල්බද්දර පද්මේගේ සමීපතයන් තිදෙනෙකු ද අත්අඩංගුවට ගත් බව පොලීසිය පැවසුවේය.
එම පිරිස අතර ඉෂාරා සෙව්වන්දිට රැකවරණය දුන් ද්රවිඩ පුද්ගලයෙකු ද අත්අඩංගුවට ගෙන තිබේ.
බොහෝදුරට එම අපරාධකරුවන් ඉදිරි දින කිහිපය තුළ දිවයිනට රැගෙන ඒමට නියමිත බව ද පොලිස් මාධ්ය ප්රකාශකවරයා පැවසීය.
ඉෂාරා සෙව්වන්දිට ශ්රී ලංකා පොලීසිය විසින් රතු නිවේදනයක් නිකුත් කර තිබුණු බවද පොලිස් මාධ්ය ප්රකාශකවරයා මෙහිදී කියා සිටියේය.
සංවිධානාත්මක අපරාධකරුවකු වන සංජීව කුමාර සමරරත්න නොහොත් ගණේමුල්ල සංජීව ඉකුත් පෙබරවාරි 19 වනදා අලුත්කඩේ අධිකරණ සංකීර්ණය තුළදී වෙඩිතබා ඝාතනය කරනු ලැබූ අතර, කෙහෙල්බද්දර පද්මේගේ පාර්ශ්වය විසින් අදාළ ඝාතනය සිදුකර තිබුණි.
ඝාතනය සිදුකළ වෙඩික්කරු බවට පැවසෙන සමිඳු දිල්ෂාන් පියුමංග නැමැත්තාව එදිනම පුත්තලම, පාලවිය ප්රදේශයේදී විශේෂ කාර්ය බළකා නිලධාරීන්ගේ අත්අඩංගුවට ගත් අතර, අනතුරුව විමර්ශන නිලධාරීන් අධිකරණ සංකීර්ණයේ පිහිටි CCTV කැමරා පරීක්ෂා කළ අතර එහිදී අනාවරණ වුණේ කාන්තාවක් ද වෙඩික්කරුගේ සහායට පැමිණ ඇති බවය.
අදාළ කාන්තාව නීති ක්ෂේත්රයේ භාවිත කරන පොතක් තුළ වෙඩිතැබීම සඳහා භාවිත කළ ගිනිඅවිය රැගෙන විත් ඇති බවට එහිදී හෙළිවූ අතර, ඒ අනුව පොලීසිය සිදුකළ විමර්ශනවලදී අනාවරණ වී තිබුණේ, ඇය මිනුවන්ගොඩ පදිංචි ඉෂාර සෙව්වන්දි නම් කාන්තාවක් බවය.
එම අපරාධය සිදුකර ඉෂාරා සෙව්වන්දි බෝට්ටු මාර්ගයෙන් ඉන්දියාවට පලා ගොස් ඇති අතර, එයට JK බායි නැමැත්තා උපකාර කර ඇතැයිද වාර්තා වේ.ඇය රු ලක්ෂ 65ක් පමණ වියදම් කර ඉන්දියාවට පලාගොස් එහි සති තුනක පමණ කාලයක් රැඳී සිට තිබේ.
