කටුනායක ගුවන් තොටුපලේ නව මගී පර්යන්ත සංකීර්ණයේ ඉදිකිරීම් බරපතළ ලෙස ප්‍රමාද වීම සම්බන්ධව වරාය,නාවික හා ගුවන් සේවා අමාත්‍ය නිමල් සිරිපාල ද සිල්වා මහතා එම ඉදිකිරීම් කොන්ත්‍රාත් සමාගම්වලට සිය බලවත් අප්‍රසාදය පළ කළේය.පසුගියදා එම ඉදිකිරීම් පිළිබඳ නිරීක්ෂණ චාරිකාවක නිරත වූ අමාත්‍යවරයා මාධ්‍යයට ප්‍රකාශ කළේ මෙම ඉදිකිරීම් සමාගම් තෝරාගනු ලැබුවේ ජපාන රජය විසින් බවත් එම නිසා මෙම ඉදිකිරීම්වල පවතින බරපතළ ප්‍රමාදය පිළිබඳව ජපාන රජයට පැමිණිලි කරන බවය.
එහි දී වැඩිදුරටත් අදහස් දැක් වූ අමාත්‍යවරයා කියා සිටියේ,මෙම ඉදි කිරීම්වලට අදාල කොන්ත්‍රාත් අත්සන් තබනු ලැබුවේ මීට වසර අටකට පමණ පෙර බවත්, නමුත් මේ දක්වා එහි සැලකිය යුතු ප්‍රගතියක් දක්නට නැති බවය.මෙම ව්‍යාපෘතිය යටතේ නව මගී පර්යන්තයක් හා ඊට අදාළ ගුවන් යානා මෙහෙයුම් පද්ධතිය ද ඉදිකිරීමට සැලසුම් කර ඇත.මෙම සමස්ත සංවර්ධන ව්‍යාපෘතියේ සමස්ත වැය ඇස්තමේන්තුව රුපියල් බිලියන එකසිය දහතුනකි (113).ඒ සඳහා ජයිකා ආයතනයද මූල්‍ය දායකත්වය ලබා දී ඇත.මෙහි ඉදිකිරීම් 2019 දි සහ 2020 දී ආරම්භ කර ඇති අතර එම කොන්ත්‍රාත් ගිවිසුමට අනුව ඉදිකිරීම් මේ වන විට අවසන් අදියරේ පැවතිය යුතු නමුත්,සෑහීමකට පත්වීමට හැකි තරමට එම ඉදිකිරීම් මේ දක්වා සිදු නොවී ඇති බව අමාත්‍යවරයා පෙන්වා දුන්නේය.
එසේම මෙම දෙවන පර්යන්තය වර්තමානයේ පවතින ගුවන්තොටුපල පිළිබඳ ජාත්‍යන්තර ප්‍රමිතියට අනුකූලව ඉදි කිරීමට සැලසුම් කර තිබුණ ද වර්තමානයේ එම මුල් සැලැස්මට පරිබාහිරව එහි ආරක්ෂක පද්ධතිය ජාත්‍යන්තර අයිකාවෝ ප්‍රමිතියෙන් තොරව ඉදිකිරීමට සූදානම් වන බවට තොරතුරු ලැබී ඇති බව ද අමාත්‍යවරයා මෙහි දී පැවසීය.
ඉදිකිරීම් සමාගමේ උදාසීන තත්ත්වය සහ ඉන්ධන අර්බුදය මෙයට බලපෑව ද එකඟ වූ දිනයට කොන්ත්‍රාත් කටයුතු අවසන් කිරීම කොන්ත්‍රාත්කරුගේ වගකීම බව අමාත්‍යවරයා මෙහි දී තරයේ පෙන්වා දුන්නේය.එසේම අතුරු කොන්ත්‍රාත්කරුවන් තෝරා ගැනීමේ දී බරපතල අක්‍රමිකතා සිදුවී ඇති බවත් නුසුදුසු අතුරු කොන්ත්‍රාත්කරුවන්ට එම ඉදිකිරීම් කොන්ත්‍රාත්තු බාර දීම ද මෙම සංවර්ධන ව්‍යාපෘතියේ කටයුතු අඩාල වීමට හේතු වී ඇති බැවින් එම අතුරු කොන්ත්‍රාත්කරුවන් පිළිබඳව නිසි විමර්ශනයක් කරන ලෙස අමාත්‍යවරයා ගුවන් තොටුපොළ හා ගුවන් සේවා සමාගමේ අධ්‍යක්ෂ මංඩලයට උපදෙස් දුන්නේය.
කටුනායක ජාත්‍යන්තර ගුවන් තොටුපොළේ දෙවන මගේ පර්යන්තයක් සහ ගුවන්යානා මෙහෙයුම් පද්ධතියක් ඉදි කිරීමට ආරම්භ කළේ පවතින මගී පර්යන්තයේ පැවති දැඩි තදබදය සහ ඉඩපාඩු අවම වීම නිසා බව ද අමාත්‍යවරයා මෙහි දී පෙන්වා දුන්නේය. මෙරටට පැමිණෙන සංචාරකයන්ට උපරිම පහසුකම් සහ කාර්යක්ෂම සේවයක් ගුවන් තොටුපොළ තුළ ලබාදීමට මෙම දෙවන මගී පර්යන්ත ඉදිකිරීමේ කටයුතු ආරම්භ කර බව ද අමාත්‍යවරයා සිහිපත් කළේය.
මෙම අවස්ථාවට අමාත්‍යාංශයේ ලේකම් කේ.ඩී.එස්.රුවන්චන්ද්‍ර මහතා ගුවන් තොටුපල හා ගුවන් සේවා සමාගමේ සභාපති මේජර් ජෙනරාල් ජී. ඒ.චන්ද්‍රසිරි මහතා ද එහි අධ්‍යක්ෂ මණ්ඩල නියෝජිතයන් ද ජපන් ඉදිකිරීම් සමාගම් හි නිලධාරීහු ද සහභාගි වූහ.
